Telescopio espacial Hubble

O telescopio espacial Hubble (u HST per as suyas siglas en anglés) ye un telescopio que orbita en l'exterior de l'atmosfera, en orbita circular arredol d'a Tierra a 593 km de altaria sobre lo livel d'o mar, con un periodo orbital entre 96 y 97 menutos. Denominau d'ixa forma en honor d'o astronomo Edwin Hubble, estió meso en orbita lo 10 de marzo de 1990 en a misión STS-31 como un prochecto conchunto d'a NASA y la ESA.. L'avantalla de disposar d'un telescopio dillá d'a distorsión que produz l'atmosfera terrestre ye esencialment que d'ista traza se pueden eliminar os efectos d'a turbulencia atmosferica. Amás, l'atmosfera absorbe fuertement a radiación electromagnetica en bellas longarias d'onda, especialment en l'infrarroyo. Os telescopios terrestres se veyen tamién afectaus per factors meteorolochicos (como a presencia de boiras) y la contaminación lumínica ocasionada per os grans asentamientos urbans. . Una d'as caracteristicas prencipals d'o telescopio Hubble yera la posibilidat d'estar vesitau per astronautas en as clamadas misions de servicio (u SM per as suyas siglas en anglés). En ixas misions de servicio se podeban apanyar elementos estricallaus, instalar nuevos trastes y elevar a orbita d'o telescopio. Se realizoron cinco misions de servicio (SM1, SM2, SM3A, SM3B y SM4). A zaguera tenió puesto en mayo de 2009. O sucesor cientifico d'o telescopio Hubble será lo telescopio espacial James Webb (JWST) que lo suyo lanzamiento ye previsto pa lo 2020.